МОУ «Пиксясинская основная общеобразовательная школа»

Адрес: 431857 РМ Ардатовский район, с. Пиксяси, ул. Садовая,39

Директор школы: Саушкина Мария Николаевна

Автор: Громов Максим – 8 кл.

Руководитель: Королева Светлана Александровна   

Сочинение на тему: «Келесь эжди ойменть»    

   Эрзятне эрить Россиянть, СНГ-нть келес. Истя уш лиссь: срадынек мирганть -масторганть. А шождыне мекев вейсэндявомс. Ялатеке бажатано ды кемтяно тенень.

   Кие эрзятнестэ вечксы тиринь келенть, бажи седе ламо содамо эсь раськеденть, седикелень ды течинь эрямодонзо, койдензэ – кирданзо ды мелявты сонзэ вандынь чиденть, се а туи лия масторов паро эрямонь вешнеме. Паряк, мекевланк, туезетне кармить велявтомо эрзянь масторов, покштянь- покшавань модаст лангс ды таго теевить тесэ азорокс.

  Эрзянь келентень вишка пингстэ саезь седейсэнь кирдян покш вечкема. Васенце валом ёвтыя эрзянь кельсэ – «авай». Васенце эскелькст теинь эрзянь масторга. Эрзянь келесь кармась улеме эрямосон кеме юрокс. Школасо тонавтыцям бажи седеяк кастомс тиринь келентень вечкемам. Эрзянь келень ды литературань уроктнесэ минь кенярдозь ловнотанок:

Эрзянь кель, эрзянь кель –

Ашо килей, чуди лей,

Чольдердиця горнипов,

Гайсэ морыця цеков!

   Эрзянь келесь – тетянь – авань кель. Сон максы тень вий, сы шкантень ды ломантненень кемема. Сюкпря мерян Пазонтень, мекс чачинь – касынь эрзякс.

  Паро меревксэнть смустезэ: «Се, конань арась мелезэ тонавтнемс тиринь келенть – пайстомо ломань». Кода а жаль истятнэде минек шкастонть а лововитькак зяро. Сынь паро ладсо а содасызь тиринь келенть, сэкскак сеедьстэ тейнесызь пейдемакс рузонсентькак.

  Келенть мельга ламо ваныцятне тешкстыть неень шкане эрзянь валтнэнь рузыямост. Лия масторонь валтнэяк кеместэ пезныть келентень. Комсеце пингесь кандсь од енкст – сынст марто састь лия валт, конатнень смустест эрзянь кельсэнть мик стака евтамскак.

  Нама, эрзянь келень рузыямонть лоткавтомась аволь минек вийсэ. Мерян седе ламо: сонзэ лоткавтомскак а мезекс. Алкуксонь ломанесь зярдояк а кадсы эсь келензэ, а стувтсы эсь тиринь енксонзо.

  Минек вишка Мордовиясь сови рузонь масторс. Эрямо лувонь  койтнень арсизь рузокс кортыця ломантне, рузонь прев ды мель марто. А зяро книгат сермадозь эрзянь кельсэ? Сеске лововить. Вадря се, што аламонь – аламонь кармасть лисеме  журналт, газетат,  сермадозь эрзянь кельсэ. Вантано эрзянь кельсэ телевизорсто невтемкат.

  Икеле, зярдо ламот эзть машто ловномо, арасельть кодаткак книгат, вейсэ морсильть  эрзянь морот, сестэ кияк эзь пеле келенть емамодо. Сюкпря сенень, што эрямосонть полавтовоматне кандыть монь тиринь келентень мирэнть – масторонть келес гайгема. Минек республикась кармась улеме лувокс фино - угорской народонть вейсендямонтень. Вейке раськень патя – ялакстне теить келенть содавиксэкс, неявиксэкс мирэнь- масторганть.

Нама, весе кельтне неень шкане эрявить ды те пек вадря. Ансяк сыненст минь пачкодтяно корьмаень келенть кувалма. Мон вечкса тиринь келем, а виздян эйстэнзэ ды апак кавтолдо мерян, што свал карман кирдеме, кона кирвазсь оймесэнь ды а мади зярдояк.

Те кельсэнть кортнесть ламо минек содавикс ломаненек Степан Дмитриевич Нефёдов – ине скульпторонок  истя вечкилизе тиринь келенть, тиринь народонть, што сайсь эстензэ лем Эрьзя! Истят лемтнеде аволь аламо.Сынь бажасть невтеме келенть неявиксчинзэ ды мазычинзэ.

          Бути эрзят, мекс полавтнемс келеть?

          Зяро вий максы келесь эрзянь!

           Кортак эрзякс, валтнэ витьсызь мелеть .

           Сынь миненек- казнеть умонь шкань..

Кодат видеть неть валтнэ! Ведь ансяк тиринь келесь ванстсынзе умонь шкань легендатнень, валтнэнь, койтнень ды весе эрзянь народонть улеманзо.

 Монь тиринь мастором – вечкевикс Мордовиям ашти, прок кутмордазь, Россия марто.Ков иля варшта – кеме ды вечкевикс Россия. Вишка пингстэ саезь эрзянь келенть марто вейсэ минь марятано рузонь келентькак . Теке патят-сазорт,  мельцек эскелить кеме эскелькссэ Россия ды Мордовия яла икелев ды икелев…

Пек умонь шкасто, зярдо минек масторсо кассть тусто вирть ды чудсть домка лейть, чачсь те ояксчись, вейсэндинзе народтнэнь.Ламо шка ютась, ламо ведь чудсь, ламоксть савкшнось идемс тиринь масторонть зыянонть эйстэ . Ансяк седеяк пек кемекстась ояксчись кавто ушмодей народтнэнь ютксо.

Мелявтовты ансяк се, што минь, од раськесь, а содасынек лемест Эрзянь масторонь идицятнень ды ушмодейтнень. А весе содыть, кие те Пургазсось, ки те Эрзямасонь Олёнась ды ламо – ламо лият, конат пси верьсэст валнызь тиринь моданть.

Мекс эрзянь аватне ды цёратне  а якить мазыйдеяк  мазый эрзянь ды мокшонь оршамопельсэ.

Сюкпря сетненень, конат весе виест путызь ды путыть эрзянь ды мокшонь келенть ды культуранть вельмевтеманзо кис. Ламо уш теезь ды ламо ещё эряви теемс, штобу  кирвазтемс эрзятнень ды мокшотнень мештес мельспоронь тол ды штобу апак виздть меремс: «Мон эрзян!» 

Остатка иетнестэ кармасть ламо мелень явомо эрзянь келень тонавтнемантень, национальной культурантень, традициятненень, фольклоронь кастомантень ды тонавтнемантень. Минек школасо ютавтовить ламо урок  - семинарт, викторинат, диспут тиринь масторонь коряс. Эрьва ие эрзянь келень праздникентень ютавтовить эрьва – кодат невтемат, конатнесэ минь мельспаросо кортатано эрзянь кельсэ.

   Верьга кандан прям – мон эрзянь цера. Сюпалгадт, мазылгадт, гайгкть тиринь келем, пингенть пес палт седейсэнь, эждть оймем!